Moja ya siku
ambazo hazitasahaulika na Wanaparokia ya Peramiho ni siku ya Tarehe 16, Novemba
mwaka huu 92016), siku ambayo ilikuwa maalumu ya kuhitimisha kilele cha Jubilei
ya mwaka wa Huruma ya Mungu ambayo ilipambwa kwa vifijo, shangwe na Nderemo.
Siku hiyo ambayo ilitangazwa na Baba Mtakatifu
Francis, mnamo tarehe 15, Desemba 2015 ikiwa ni sikukuu ya kukingiwa Mama Bikila
Maria dhidi ya dhambi ya asili, mwisho wake na tarehe 20, Novemba 2016, ikiwa
ni sikukuu ya Yesu Kristo Mfalme inayoadhimishwa na Wakristo wote duniani
ikiongozwa na Papa.
Waumini
toka vigango vyote ya Peramiho wakiongozwa na Mapadre, Makatekista pamoja na
viongozi wao walihudhuria maandamano hayo yaliyong’oa nanga katika viwanja vya michezo vya shule ya
ufundi Peramiho, huku wakiimba nyimbo za kumsifu Mungu na baadaye walinyunyizwa
maji ya baraka toka kwa Paroko wa Kanisa la Peramiho.
Sakramenti
ya kitubio au toba ni sehemu ya maisha ya Mkatoliki, hivyo siku hiyo adhimu ya
kumsifu Mungu, kabla ya Misa takatifu
waumini walipata fursa ya kutubu dhambi zao ili kujisafisha kabla ya hitimisho
la mwaka wa huruma.
Katika Misa
ambayo iliongozwa na Naibu Askofu wa Jimbo kuu la Songea, Padre Kamilius Haule
akisaidiana na Padre Stefano Komba OSB, Damas Chale pamoja na Mseminari
Fredrick Mwabena OSB,alifafanua haya katika mahubiri yake:
“Wanaperamiho
kuweni na huruma kama Baba alivyokuwa na Huruma (Lk 6:36), napongeza utaratibu
mzuri uliowekwa na Parokia ya Peramiho katika kuhitimisha mwaka wa huruma kwa
amani na upendo”
“Swali
la kwanza katika Katekisimu ya Kanisa Katoliki huuliza: tupo duniani kwa kusudi
gani? Jibu, ni tupo duniani ili tumjue Mungu, tumpende, tumtumike na tufikie
ufalme wake wa mbinguni. Ndio maana tunamwita ni Mungu Mfalme, hata Bwana wetu
Yesu Kristo huitwa ni Mfalme kwa kuwa yeye ni mwokozi wetu”
“Mungu
alimuumba mtu kwa mapendo yake na huruma
yake tu: mtu angeweza kuumbwa kitu kingine kama vile Nguruwe hata Mdudu lakini
ameumbwa kuwa mtu kwa sababu ya huruma yake”
“Mtu
ukiwa na mali,watoto au kazi nzuri; uwe ni Mtawa, Padre, Daktari au Mwanandoa
usijivune bure, maana yote hayo ni kwa huruma ya mwenyezi Mungu aliyeumba mbingu
na dunia na viumbe vyote vinavyoonekana na visivyoonekana”
“Mungu
alimuumba mtu kwa mapendo yake: kupumua kwetu na kutenda kwetu kupo ndani ya
Mungu mwenye huruma. Binadamu hana lolote lile, leo yupo kesho hayupo,
mwanadamu ameumbwa na Mola, bila yeye hawezi kufanya lolote, binadamu ni wakuagizwa
na kutekeleza” alifafanua Haule kisha akaendelea.
Sakramenti ya Ubatizo
“Tuwabatize
watoto wetu katika Kanisa ili wapate Sakramenti ya Ubatizo, kwa kuwa Kanisa
linamzaa mtoto kiimani kwa ubatizo, baada ya kuzaliwa kimwili toka kwa Baba na
Mama”
Sakramenti ya kitubio
“Waumini
waungame dhambi zao katika Sakramenti ya kitubio kupitia kwa Padre kwani mpango
huo uliwekwa na Mungu kwa ajili ya wokovu. Watu wasifuate upotoshaji wa
madhehebu kwa kuwa Padre aliwekwa na
Yesu na si Malaika ambaye hajui hali halisi ya ubinadamu ulivyo, tuongee na
Mungu kupitia kitubio na sala ili tufike Mbinguni vinginevyo tutaenda motoni”.
“Watu
wengi wanaona aibu kuungama dhambi zao kwa Padre, mbona daktari unamwonesha hata
sehemu za siri ili kupona ugonjwa wako? Sembuse dhambi kwa Padre ambayo ni
mbaya zaidi ya ugonjwa?”
“Tusifungwe
na shetani ambaye nia yake ni kutupeleka motoni, Adam alipata mke baada ya kutoka
usingizini ni huruma ya Mungu, tufungue mioyo yetu kupokea huruma ya Mungu na
kuwasaidia wengine wenye shida ya uokovu” alisisitiza Haule.
Adhimisho
hilo la kufunga mwaka wa huruma liliambatana na matukio mbali mbali ikiwemo
tukio la ubatizo kwa watu 34, Kipaimara watu 62 huku Ndoa Nane zikifungwa kwa kufuata taratibu zote za
Kanisa.
Vile
vile kulikuwa na tukio la wanajubilei wa ndoa pea moja ambao walitimiza miaka
40, Jubilei ya miaka 60 pea moja na Jubilei ya miaka 50 pea moja, kisha watu wawili walimshukuru mungu kwa kutimiza
miaka 60 akiwemo Paroko wa Kanisa la Peramiho Padre Joseph Ndimbo.
Imeandaliwa
na
Kat.
George Millinga na
Alex
Mapunda,
Peramiho.
Post a Comment